یہ پیاری پیاری بطخیں چلتی ہیں کس انداز سے

یہ پیاری پیاری بطخیں چلتی ہیں کس انداز سے

جیسے حسیں شہزادیاں اٹھلا رہی ہوں ناز سے

ہے زرد گیندوں کی طرح ہم راہ بچوں کا کٹمب

تم روئی کے گالے کہو گولے کہیں ریشم کے ہم

ہیں رانیاں تالاب کی یہ اجلی اجلی بطخیں

بیلوں بھری جھیلوں کی ہیں ان سے ہی قائم رونقیں

تن دودھیا چکنے ہیں پر سینے تنے اکڑے ہیں سر

یا کشتیاں چاندی کی ہیں شفاف سطح آب پر

مرمر کے بت ہیں تیرتے پانی کے اوپر شان سے

پریاں یہ شوخ و شنگ سی آئی ہیں نورستان سے

ایسی سفید و خوش نما جیسے کھلونے برف کے

یا تختۂ بلور پر روشن ہیں مومی قمقمے

چونچیں سنہری کھول کر قیں قیں کی تانیں گھول کر

لہروں میں لہراتی ہیں یہ پنجوں کے چپو تول کر

نیلوفروں کا کنج ہے ان کی مسرت کا جہاں

نکھرے ہوئے سندر کنول دیتے ہیں ان کو تھپکیاں

ye pyari pyari battakhen chalti hain kis andaz se

jaise hasin shahzadiyan ithla rahi hun naz se

hai zard gendon ki tarah ham rah bachchon ka katmab

tum roi ke gale kaho gole kahin resham ke ham

hain raniyan talab ki ye ujli ujli battakhen

bilon bhari jhilon ki hain un se hi qaim raunaqen

tan dudhiya chukne hain par sine tane akre hain sar

ya kashtiyan chandi ki hain shaffaf sath-e-ab par

marmar ke but hain tairte pani ke upar shan se

pariyan ye shokh-o-shang si ai hain naurastan se

aisi safed-o-khush numa jaise khilaune barf ke

ya takhta-e-bilur par raushan hain momi qumqume

chonchen sunahri khol kar qen qen ki tanen ghol kar

lahron mein lahrati hain ye panjon ke chapo tol kar

nilofaron ka kunj hai un ki masarrat ka jahan

nikhre hue sundar kanwal dete hain un ko thapakiyan