میں گروی رکھی گئی آنکھوں میں

میں گروی رکھی گئی آنکھوں میں

بسا خواب ہوں

لا محدود سمندر میں تیرتے

جزیروں کا

جہاں مہاجر پرندے گھڑی بھر

بسیرا کرتے ہیں

نیلگوں پانیوں کا

ساحلوں کے کنارے

چمکتی ریت کا

وہ خواب

جو بہہ نکلتا ہے

نمکین قطرے کی صورت

میں وہ آزاد روح ہوں

جو غلام جسموں کے اندر

تڑپتی ہے

بھٹکتی پھرتی ہے

درد سے پھٹتے سر کی

درز سے

نکلنے کو بے تاب ہوتی ہے

میں وہ مہمل صحیفہ ہوں

تہہ در تہہ لپٹا ہوا

جس کے معنی کی سلطنت

آشکار نہیں ہوتی

مگر کتاب پو کی مانند

روز پھٹتی ہے

main girwi rakhi gai ankhon mein

basa khwab hun

la mahdud samundar mein tairte

jaziron ka

jahan muhajir parinde ghari bhar

basera karte hain

nilgun paniyon ka

sahilon ke kinare

chamakti ret ka

wo khwab

jo bah nikalta hai

namkin qatre ki surat

main wo azad ruh hun

jo ghulam jismon ke andar

tarapti hai

bhatakti phirti hai

dard se phatte sar ki

darz se

nikalne ko be tab hoti hai

main wo mohmal sahifa hun

tah dar tah lipta hua

jis ke maani ki saltanat

ashkar nahin hoti

magar kitab pau ki manind

roz phatti hai