اگر سمندر مجھے راستہ دیتا

اگر سمندر مجھے راستہ دیتا

تو سفر کرتی اس قندیل کے ساتھ

جو شام کا ملگجا پھیلتے ہی

ساحل پر روشن ہو جاتی ہے

اڑتی ققنس کے ہم رکاب

افق کی مسافتوں میں

تیرتی مچھلیوں کے سنگ

کھوجتی ریگ زاروں میں

نیلگوں پانیوں کو

سرمئی پہاڑوں میں

جادوئی سرنگوں کو

لیکن میرے سرہانے

آدھے پونے خواب پڑے ہیں

اور میری شیلف پر دھرے ہیں

کانچ کے نازک برتن

سبزی کے چھلکے

گھر کی دیواروں پر

میرے بیٹے کی کھنچی لکیروں میں

ان سنی کہانیاں ہیں

جو مسکراتی کھلکھلاتی ہیں

اور باتیں کرتی ہیں آنکھوں ہی آنکھوں میں

وہ کہانیاں سنتی میں دفعتاً چونک جاتی ہوں

ادھورے خواب بھی میرے

کتنے شرمندۂ تعبیر ہوئے

مگر پھر بھی ڈرتی ہوں

کہ میری بیٹی

آدھے خواب دیکھ کر

انہیں ادھورا چھوڑ نہ دے

بوند بوند دعا اترتی ہے

دل کی زمیں پہ

پہلی بارش کی مانند

اور سیلی مٹی سے شاخ در شاخ

تمنائیں پھوٹ پڑتی ہیں

agar samundar mujhe rasta deta

tu safar karti is qindil ke sath

jo sham ka malgaja phailte hi

sahil par raushan ho jati hai

urti qaqnus ke ham rikab

ufuq ki masafaton mein

tairti machhliyon ke sang

khojti reg zaron mein

nilgun paniyon ko

surmai paharon mein

jadui sarnigun ko

lekin mere sirhane

adhe paune khwab pare hain

aur meri shelf par dhare hain

kanch ke nazuk bartan

sabzi ke chhalke

ghar ki diwaron par

mere bete ki khinchi lakiron mein

an suni kahaniyan hain

jo muskurati khulkhilati hain

aur baten karti hain ankhon hi ankhon mein

wo kahaniyan sunti mein dafatan chaunk jati hun

adhure khwab bhi mere

kitne sharminda-e-taabir hue

magar phir bhi darti hun

ke meri beti

adhe khwab dekh kar

unhen adhura chhor na de

bund bund dua utarti hai

dil ki zamin pe

pahli barish ki manind

aur sili mitti se shakh dar shakh

tamannaen phut parti hain