جلوۂ حسن ازل آئے تصور میں اگر

جلوۂ حسن ازل آئے تصور میں اگر

گوشۂ دل میں مچلتے ہوئے ارماں ہوں گے

اک حسیں گور غریباں پہ ہوا یوں گویا

یہ بھی کمبخت کبھی حضرت انساں ہوں گے

پاؤں رکھتے بھی نزاکت سے اگر ہوں گے کہیں

بے بدل حسن جہاں سوز پہ نازاں ہوں گے

پھول بستر پہ بچھانے کو اگر حاصل تھے

سیر کے واسطے باغ اور گلستاں ہوں گے

عطر ملنے کے لئے کپڑے بدلنے کے لئے

محل و ایواں میں بہت دست حسیناں ہوں گے

نت نئی روز میسر تھی انہیں بزم سرود

دل بہلنے کے لئے سینکڑوں ساماں ہوں گے

ایک لمحہ بھی گزرتا تھا جو تنہائی میں

مضطرب اور پریشان یہ ذیشاں ہوں گے

گور و مرقد پہ یوں ہی سیر کو آتے ہوں گے

اور سینوں میں لئے حسرت و ارماں ہوں گے

کیا خبر تھی کہ اجڑ جائے گا گلزار حیات

ایک جھونکے سے ہوا کے نہ یہ ساماں ہوں گے

کیا یوں ہی موت مٹائے گی جہاں سے ہم کو

کیا یوں ہی اپنے لئے دشت و بیاباں ہوں گے

زندگی میں نہ کریں گے جو بشر کار ثواب

وقت رخصت وہ پریشان و پشیماں ہوں گے

آفتابؔ ان کی سمجھتا ہوں حیات ابدی

جو بشر دھرم پہ سو جان سے قرباں ہوں گے

jalwa-e-husn-e-azal ae tasawwur mein agar

gosha-e-dil mein machalte hue arman honge

ik hasin gor-e-ghariban pe hua yun goya

ye bhi kambakht kabhi hazrat-e-insan honge

paon rakhte bhi nazakat se agar honge kahin

be badal husn-e-jahan soz pe nazan honge

phul bistar pe bichhane ko agar hasil the

sair ke waste bagh aur gulistan honge

itr milne ke liye kapre badalne ke liye

mahal-o-aiwan mein bahut dast-e-hasinan honge

nit nai roz muyassar thi unhen bazm-e-surud

dil bahalne ke liye sainkron saman honge

ek lamha bhi guzarta tha jo tanhai mein

muztarib aur pareshan ye zishan honge

gor-o-marqad pe yun hi sair ko ate honge

aur sinon mein liye hasrat-o-arman honge

kya khabar thi ke ujar jaega gulzar-e-hayat

ek jhonke se hawa ke na ye saman honge

kya yun hi maut mitaegi jahan se ham ko

kya yun hi apne liye dasht-o-bayaban honge

zindagi mein na karenge jo bashar kar-e-sawab

waqt-e-rukhsat wo pareshan-o-pasheman honge

aftab un ki samajhta hun hayat-e-abadi

jo bashar dharm pe sau jan se qurban honge