نہیں تنہا نہیں ہوں میں

نہیں تنہا نہیں ہوں میں

تمہارے سحر کے دھاگوں نے

میرے جسم و جاں کو باندھ رکھا ہے

حسیں یادوں کا شیریں لمس

میری روح کو چھو کر

مری آنکھوں سے بہتا ہے

تم اپنی انگلیوں کی نرم پوروں سے

مرے ہاتھوں کو چھوتے ہو

بہت دھیرے سے

تم اپنے دہکتے لب مرے گالوں پہ رکھ کر

آنسوؤں کو پونچھ دیتے ہو

میں اپنی بند آنکھوں میں

حسیں قوس قزح اور تتلیوں کے رنگ تکتی ہوں

محبت کے پرندے گیت گاتے ہیں

فضائیں گنگناتی ہیں

تمہارے بازوؤں نے میرے تن کو

تھام رکھا ہے

تمہاری سانس کی خوشبو

مری سانسوں میں الجھی ہے

تمہیں چھوتی

تمہیں محسوس کرتی ہوں

میں تم سے پیار کرتی ہوں

جدھر دیکھوں تمہی تم ہو

ہر اک پل میں تمہی تم ہو

جہاں تم ہو وہیں ہوں میں

نہیں تنہا نہیں ہوں میں

nahin tanha nahin hun main

tumhare sahar ke dhagon ne

mere jism-o-jan ko bandh rakha hai

hasin yadon ka shirin lams

meri ruh ko chhu kar

miri ankhon se bahta hai

tum apni ungliyon ki narm poron se

mire hathon ko chhute ho

bahut dhire se

tum apne dahakte lab mire galon pe rakh kar

ansuon ko ponchh dete ho

main apni band ankhon mein

hasin qaus-e-quzah aur titliyon ke rang takti hun

mohabbat ke parinde git gate hain

fazaen gungunati hain

tumhare bazuon ne mere tan ko

tham rakha hai

tumhari sans ki khushbu

miri sanson mein uljhi hai

tumhen chhuti

tumhen mahsus karti hun

main tum se pyar karti hun

jidhar dekhun tumhi tum ho

har ik pal mein tumhi tum ho

jahan tum ho wahin hun main

nahin tanha nahin hun main