یہ ایک عہد سزا ہے جزا کی بات نہ کر

یہ ایک عہد سزا ہے جزا کی بات نہ کر

دعا سے ہاتھ اٹھا رکھ دوا کی بات نہ کر

خدا کے نام پہ ظالم نہیں یہ ظلم روا

مجھے جو چاہے سزا دے خدا کی بات نہ کر

حیات اب تو انہیں محبسوں میں گزرے گی

ستم گروں سے کوئی التجا کی بات نہ کر

انہی کے ہاتھ میں پتھر ہیں جن کو پیار کیا

یہ دیکھ حشر ہمارا وفا کی بات نہ کر

ابھی تو پائی ہے میں نے رہائی رہزن سے

بھٹک نہ جاؤں میں پھر رہنما کی بات نہ کر

بجھا دیا ہے ہوا نے ہر ایک دیا کا دیا

نہ ڈھونڈ اہل کرم کو دیا کی بات نہ کر

نزول حبس ہوا ہے فلک سے اے جالبؔ

گھٹا گھٹا ہی سہی دم گھٹا کی بات نہ کر

ye ek ahd-e-saza hai jaza ki bat na kar

dua se hath utha rakh dawa ki bat na kar

khuda ke nam pe zalim nahin ye zulm rawa

mujhe jo chahe saza de khuda ki bat na kar

hayat ab to unhen mahbason mein guzregi

sitam garon se koi iltija ki bat na kar

unhi ke hath mein patthar hain jin ko pyar kiya

ye dekh hashr hamara wafa ki bat na kar

abhi to pai hai main ne rihai rahzan se

bhatak na jaun main phir rahnuma ki bat na kar

bujha diya hai hawa ne har ek diya ka diya

na dhund ahl-e-karam ko diya ki bat na kar

nuzul habs hua hai falak se ai jalib

ghata ghata hi sahi dam ghata ki bat na kar