دیپ جس کا محلات ہی میں جلے

دیپ جس کا محلات ہی میں جلے

چند لوگوں کی خوشیوں کو لے کر چلے

وہ جو سائے میں ہر مصلحت کے پلے

ایسے دستور کو صبح بے نور کو

میں نہیں مانتا میں نہیں جانتا

میں بھی خائف نہیں تختۂ دار سے

میں بھی منصور ہوں کہہ دو اغیار سے

کیوں ڈراتے ہو زنداں کی دیوار سے

ظلم کی بات کو جہل کی رات کو

میں نہیں مانتا میں نہیں جانتا

پھول شاخوں پہ کھلنے لگے تم کہو

جام رندوں کو ملنے لگے تم کہو

چاک سینوں کے سلنے لگے تم کہو

اس کھلے جھوٹ کو ذہن کی لوٹ کو

میں نہیں مانتا میں نہیں جانتا

تم نے لوٹا ہے صدیوں ہمارا سکوں

اب نہ ہم پر چلے گا تمہارا فسوں

چارہ گر دردمندوں کے بنتے ہو کیوں

تم نہیں چارہ گر کوئی مانے مگر

میں نہیں مانتا میں نہیں جانتا

dip jis ka mahallat hi mein jale

chand logon ki khushiyon ko le kar chale

wo jo sae mein har maslahat ke pale

aise dastur ko subh be nur ko

main nahin manta main nahin janta

main bhi khaif nahin takhta-e-dar se

main bhi mansur hun kah do aghyar se

kyun darate ho zindan ki diwar se

zulm ki bat ko jahl ki rat ko

main nahin manta main nahin janta

phul shakhon pe khulne lage tum kaho

jam rindon ko milne lage tum kaho

chak sinon ke silne lage tum kaho

is khule jhut ko zehn ki laut ko

main nahin manta main nahin janta

tum ne lauta hai sadiyon hamara sukun

ab na ham par chalega tumhara fusun

chara gar dardmandon ke bante ho kyun

tum nahin chara gar koi mane magar

main nahin manta main nahin janta