مجھے رنگوں سے محبت تھی

مجھے رنگوں سے محبت تھی

زندگی کے کینوس پر

میں نئے نقش و نگار بنانا چاہتا تھا

حسن کی حشر سامانیاں پینٹ کرنے کی خواہش

میرے لہو میں سرسراتی تھی

الھڑ جسموں کے زاویے

میرے مو قلم کو اپنی جانب کھینچتے تھے

آنکھوں کی گہرائیوں میں بہتے ہوئے خط

مجھے بیتاب کرتے تھے

محبت کی نظموں کی تخلیق پر

مجھے مصور بنانے پر تلے ہوئے تھے

ہنستے ہوئے رخساروں میں بنتے ہوئے ڈمپل

مگر

میں مجبور کر دیا گیا

جلتے ہوئے شہر کی تصویر کاری پر

مسخ شدہ چہروں کی شناخت کے لیے

پھولوں اور بچوں کے نوحے لکھنے پر

قدیم لفظوں کو نئی معنویت دینے کے لئے

مجھے ایک زندگی دان کرنا پڑی

mujhe rangon se mohabbat thi

zindagi ke kainwas par

main nae naqsh-o-nigar banana chahta tha

husn ki hashr samaniyan pent karne ki khwahish

mere lahu mein sirasrati thi

alhar jismon ke zawiye

mere mu qalam ko apni janib khinchte the

ankhon ki gahraiyon mein bahte hue khat

mujhe betab karte the

mohabbat ki nazmon ki takhliq par

mujhe musawwir banane par tale hue the

hanste hue rukhsaron mein bante hue dampal

magar

main majbur kar diya gaya

jalte hue shahr ki taswir kari par

maskh shuda chehron ki shanakht ke liye

phulun aur bachchon ke nauhe likhne par

qadim lafzon ko nai maanawiyyat dene ke liye

mujhe ek zindagi dan karna pari