میری موت کے مسیحا!

میری موت کے مسیحا!

تین بر اعظموں پہ تم نے میرا پیچھا کیا ہے

موسم بدلتے رہے تقدیر کی طرح

میں شہر شہر پھرا دھوپ کی طرح

میں نے خاموشیاں لفظوں کے سپرد کیں

زبان کے لفظ بدلے

مگر تم اک تاریک سرنگ کی طرح سایہ سایہ

میرے شعور میں اترتے چلے گئے ہو

میرے ذہن میرے جسم میرے قلب کے معکوس رخ!

میری تحریروں کے آسیب!

تم میری تنہائی ہو میرے وجود کی انتہا اور شکست

چاہے ہوئے بدن تمہاری آغوش میں راکھ ہو گئے ہیں

ابدی خاموش حریف!

تم کائنات کے تمام نور کے ساتھ شطرنج کھیلتے رہے ہو

میں نے تمہاری قوتوں کی ہمہ گیر گنجلک بساط پہ

خانہ بہ خانہ۔۔۔

عشق اور لفظوں کی صلیبیں بچھائیں:

تم ہواؤں کی مثال میرے آس پاس برستے رہے

تم ہر شام پھولوں پہ یلغار کرتے پانیوں پہ چلتے رہے ہو

یہ جانتے ہوئے بھی کہ میرے لفظ

ریت کے چہرے پہ کھنچے ہوئے بے ثبات نقش ہیں

میں نے ہر ابتدا ہر انتہا کا اثبات کیا ہے

فاصلوں کی طرح تم سب کچھ نکلتے چلے گئے ہو

ہمارا جھگڑا تا عمر جاری رہے گا

میرے سانسوں کے ساتھی اور دشمن:

میرے ہم شکل:

مقدر کی بند کتاب:

میں نے تمہارے راز جاننے چاہے

کلنڈر کی تاریخوں میں تمہیں پڑھنا چاہا

پلکوں کے درمیان تمہارے لباس کے نامعلوم تار بچھائے

یاد رکھو!

ہر روشنی نے تمہیں اپنے فانی شعلوں میں لپیٹنا چاہا

مگر وقت کی کلید!

تم نے کنجیوں کا گچھا نہ جانے کس مٹی میں دفن کر دیا ہے

تم جھوٹے لفظوں کی طرح

میری انگلیوں میں سے پھسلتے چلے گئے ہو

meri maut ke masiha!

tin bar aazamon pe tum ne mera pichha kya hai

mausam badalte rahe taqdir ki tarah

main shahr shahr phira dhup ki tarah

main ne khamoshiyan lafzon ke supurd kin

zaban ke lafz badle

magar tum ik tarik surang ki tarah saya saya

mere shuur mein utarte chale gae ho

mere zehn mere jism mere qalb ke maakus rukh!

meri tahriron ke aseb!

tum meri tanhai ho mere wajud ki intiha aur shikast

chahe hue badan tumhari aghosh mein rakh ho gae hain

abadi khamosh harif!

tum kainat ke tamam nur ke sath shatranj khelte rahe ho

main ne tumhari quwwaton ki hama gir gunjlak bisat pe

khana ba khana...

ishq aur lafzon ki saliben bichhaen:

tum hawaon ki misal mere as pas baraste rahe

tum har sham phulon pe yalghar karte paniyon pe chalte rahe ho

ye jante hue bhi ke mere lafz

ret ke chehre pe khinche hue be sabat naqsh hain

main ne har ibtida har intiha ka isbat kya hai

faslon ki tarah tum sab kuchh nikalte chale gae ho

hamara jhagra ta umr jari rahega

mere sanson ke sathi aur dushman:

mere ham shakl:

muqaddar ki band kitab:

main ne tumhare raz janne chahe

kalnidar ki tarikhon mein tumhen parhna chaha

palkon ke darmiyan tumhare libas ke namaalum tar bichhae

yad rakho!

har raushni ne tumhen apne fani sholon mein lapetna chaha

magar waqt ki kilid!

tum ne kanjiyon ka guchchha na jane kis mitti mein dafn kar diya hai

tum jhute lafzon ki tarah

meri ungliyon mein se phisalte chale gae ho