کیوں مرے خواب کو دھندلاتے ہو

کیوں مرے خواب کو دھندلاتے ہو

خواب

انگڑائی ہے

تھرتھراتے ہوئے پاؤں

بیتی آوازوں کی لہریں

اور بل کھاتا ہوا سیمیں بدن

جس کے اک اک انگ میں میرے لہو کی دھڑکن

آسمانوں کی طرف اٹھتے ہوئے وہ مرمریں بازو

کسی شاہین کی پرواز

اور ہاتھوں کی پوروں سے شعاعوں کی پھوار

خواب کو انگڑائیوں کی ایک بل کھاتی ہوئی پرواز بننے دو

جو میرے خواب کو دھندلاؤ گے

تو ٹکڑے ٹکڑے ہو کے تم خود منجمد ہو جاؤ گے

یا بیتی آوازوں میں ڈوبو گے

یا اپنے خون کے اس تیز دھارے ہی میں بہہ جاؤ گے

یا جلتی شعاعوں کی تمازت میں بھسم ہو جاؤ گے

kyun mire khwab ko dhundlate ho

khwab

angrai hai

thartharate hue paon

biti awazon ki lahren

aur bal khata hua simin badan

jis ke ik ik ang mein mere lahu ki dharkan

asmanon ki taraf uthte hue wo marmarin bazu

kisi shahin ki parwaz

aur hathon ki poron se shuaon ki phuar

khwab ko angraiyon ki ek bal khati hui parwaz banne do

jo mere khwab ko dhundilao ge

tu tukre tukre ho ke tum khud munjamid ho jaoge

ya biti awazon mein duboge

ya apne khun ke is tez dhare hi mein bah jaoge

ya jalti shuaon ki tamazat mein bhasam ho jaoge