وہ ایک پتھر

وہ ایک پتھر

وہ سخت کالا سیاہ پتھر

لہو سے تر

جس کی تیرگی ناگ بن کے ڈستی تھی

جس کی سختی سے کوہساروں کے دل دہلتے تھے

جس کی خوں تشنگی سے کومل شجر فقط ٹہنیوں کی حسرت کے زاویے تھے

وہ ایک پتھر

جو تو نے پھینکا

مرے سمندر میں حرکت لا زوال کا ایک تازیانہ بنا

وہ لہریں اٹھیں

کہ خاموش چاندنی کی روپہلی چادر بھی تھرتھرائی

وہ جھاگ کا نور تیرگی کے سیاہ پردوں کو چاک کرنے لگا

وہ شیشے کی ایک دیوار

جس کو تو یہ سمجھ رہا تھا

کہ ایک ٹھوکر سے چور ہوگی

وہ ایک سونے کا تھال بن کر دمک رہی ہے

wo ek patthar

wo sakht kala siyah patthar

lahu se tar

jis ki tirgi nag ban ke dasti thi

jis ki sakhti se kohsaron ke dil dahalte the

jis ki khun tishnagi se komal shajar faqat tahniyon ki hasrat ke zawiye the

wo ek patthar

jo tu ne phenka

mire samundar mein harkat la zawal ka ek taziyana bana

wo lahren uthen

ke khamosh chandni ki rupehli chadar bhi thartharai

wo jhag ka nur tirgi ke siyah pardon ko chak karne laga

wo shishe ki ek diwar

jis ko to ye samajh raha tha

ke ek thokar se chur hogi

wo ek sone ka thal ban kar damak rahi hai