لفظ تقدیر مری

لفظ تقدیر مری

حسن بھی لفظ میں ہے

عشق بھی لفظ میں ہے

عدل بھی لفظ میں ہے

لفظ میں ساز ازل

لفظ میں راز ابد

لفظ معمورۂ خوشبو

لفظ اک قوس قزح

لفظ بادل کا خرام

لفظ دریا کی روانی

لفظ میں رفعت کوہ

لفظ میں وسعت صحرا

لفظ مٹی کا نمو

لفظ میں چاند کا محور

لفظ میں مطلع خورشید درخشاں

لفظ نیرنگی ایام کی دھڑکن

لفظ حیرت کدۂ کون و مکاں

لفظ میں وقت کی رفتار کی چاپ

جسم کا رمز شناسا بھی ہے لفظ

لفظ میں آنکھ کا نور

لفظ آواز کا روپ

لفظ ہی زلف دوتا

لفظ ہی روئے منور

لفظ شیرینیٔ لب

لفظ انداز جنوں

لفظ ہی روح کا دانائے سبل

لفظ ہے اس کا جمال

لفظ ہے اس کا جلال

لفظ موجود بھی ہے غیب بھی ہے

لفظ ہے حامل اسرار و رموز

لفظ نمرود کی آتش میں گل افشاں

لفظ سے وادیٔ سینا بھی ہوئی بقعۂ نور

ید بیضا بھی ہے لفظ

دم عیسیٰ بھی ہے لفظ

لفظ ہی شق قمر

لفظ براق ہے معراج کی شب

لفظ ہی روح امیں

میں بھی اک لفظ ہی تھا

مگر اب بکھرا ہوا حرفوں میں

حرف ظلمات میں محصور ہوئے

منتظر ہوں

دم عیسیٰ

ید بیضا

ان کو پھر لفظ بنا دے

lafz taqdir miri

husn bhi lafz mein hai

ishq bhi lafz mein hai

adl bhi lafz mein hai

lafz mein saz-e-azal

lafz mein raz abad

lafz mamura-e-khushbu

lafz ik qaus-e-quzah

lafz badal ka khiram

lafz dariya ki rawani

lafz mein rifat-e-koh

lafz mein wusat-e-sahra

lafz mitti ka numu

lafz mein chand ka mehwar

lafz mein matla-e-khurshid-e-darakhshan

lafz nairangi-e-ayyam ki dharkan

lafz hairat kada-e-kaun-o-makan

lafz mein waqt ki raftar ki chap

jism ka ramz shanasa bhi hai lafz

lafz mein ankh ka nur

lafz awaz ka rup

lafz hi zulf-e-duta

lafz hi ru-e-munawwar

lafz shirini-e-lab

lafz andaz-e-junun

lafz hi ruh ka dana-e-sabal

lafz hai us ka jamal

lafz hai us ka jalal

lafz maujud bhi hai ghaib bhi hai

lafz hai hamil asrar-o-rumuz

lafz namrud ki atish mein gul afshan

lafz se wadi-e-sina bhi hui buqa-e-nur

yad-e-baiza bhi hai lafz

dam-e-isa bhi hai lafz

lafz hi shaqq-e-qamar

lafz barraq hai meraj ki shab

lafz hi ruh-e-amin

main bhi ik lafz hi tha

magar ab bikhra hua harfon mein

harf-e-zulmat mein mahsur hue

muntazir hun

dam-e-isa

yad-e-baiza

un ko phir lafz bana de