تب ہزاروں اندھیروں سے

تب ہزاروں اندھیروں سے

اک روشنی کی کرن پھوٹ کر

سرد ویران کمرے کے تاریک دیوار و در سے الجھنے لگی

اور کمرے میں پھرتے ہوئے

سیکڑوں زرد ذرے

صداؤں کے آغوش پر

بلبلاتے سسکتے ہوئے

میری جانب بڑھے

میں نے اپنی شہادت کی انگلی اٹھائی

زرد ذروں سے گویا ہوا

دوستو

آؤ بڑھتے چلیں

روشنی کی طرف روشنی کی طرف

روشنی جو ہماری تمناؤں کی پیاس ہے

روشنی کی طرف روشنی کی طرف

روشنی جو ہماری تمناؤں کی پیاس ہے

روشنی جو ہماری تمناؤں کی آس ہے

زرد ذرے میرے ساتھ بڑھنے لگے

روشنی کی طرف روشنی کی طرف

چند ذرے کہ جن کی رگوں میں

سیہ رات کی ظلمتیں بس چکی تھیں

میری باتوں پہ ہنسنے لگے

اور ہنستے رہے

تب ہزاروں اندھیروں کے سینے میں

پھیلا ہوا اک طلسم

روشنی کی تب و تاب سے

ٹوٹنے کے لیے

اور آگے بڑھا

tab hazaron andheron se

ik raushni ki kiran phut kar

sard wiran kamre ke tarik diwar-o-dar se ulajhne lagi

aur kamre mein phirte hue

saikron zard zarre

sadaon ke aghosh par

bilbilate sisakte hue

meri janib barhe

main ne apni shahadat ki ungli uthai

zard zarron se goya hua

dosto

ao barhte chalen

raushni ki taraf raushni ki taraf

raushni jo hamari tamannaon ki pyas hai

raushni ki taraf raushni ki taraf

raushni jo hamari tamannaon ki pyas hai

raushni jo hamari tamannaon ki as hai

zard zarre mere sath barhne lage

raushni ki taraf raushni ki taraf

chand zarre ke jin ki ragon mein

siyah rat ki zulmaten bas chuki thin

meri baton pe hansne lage

aur hanste rahe

tab hazaron andheron ke sine mein

phaila hua ik tilism

raushni ki tab-o-tab se

tutne ke liye

aur age barha