کیوں نہ تڑپا دے جہاں کو سوختہ جانوں کی بات

کیوں نہ تڑپا دے جہاں کو سوختہ جانوں کی بات

مضطرب کرتی ہے انسانوں کو انسانوں کی بات

دل شکستہ حوصلے حیراں نگاہ آرزو

زندگی کو راس کب آئی صنم خانوں کی بات

تیرگیٔ گیسوئے ہستی کا عالم کیا کہیں

دل ہی دل میں گھٹ کے رہ جاتی ہے ارمانوں کی بات

عام ہوتا جا رہا ہے قصۂ جام و سبو

کھل رہی ہے اہل دل پر آج پیمانوں کی بات

اب نکھرتے جا رہے ہیں عارض حسن حیات

ہو رہی ہے سرخ رو خوں گشتہ ارمانوں کی بات

تشنگی لو دے رہی ہے آرزوئے زیست کو

ڈھل رہی ہے آگ کے شعلوں میں پیمانوں کی بات

تیرگیٔ دہر میں عیش و طرب کی داستاں

فیضؔ ویرانے میں ہو جیسے گلستانوں کی بات

kyun na tarpa de jahan ko sokhta janon ki bat

muztarib karti hai insanon ko insanon ki bat

dil shikasta hausle hairan nigah-e-arzu

zindagi ko ras kab ai sanam khanon ki bat

tirgi-e-gesu-e-hasti ka alam kya kahen

dil hi dil mein ghut ke rah jati hai armanon ki bat

am hota ja raha hai qissa-e-jam-o-subu

khul rahi hai ahl-e-dil par aj paimanon ki bat

ab nikharte ja rahe hain ariz-e-husn-e-hayat

ho rahi hai surkh ru khun gashta armanon ki bat

tishnagi lo de rahi hai arzu-e-zist ko

dhal rahi hai ag ke sholon mein paimanon ki bat

tirgi-e-dahr mein aish-o-tarab ki dastan

faiz wirane mein ho jaise gulistanon ki bat