ہم جانتے ہیں

ہم جانتے ہیں

یہ دنیا ہمیں جینے نہیں دے گی

فاصلے کی دیواریں

ہم دونوں کے درمیان

بڑھتی رہیں گی

یہ کیسا رشتہ ہے

ہم دونوں اپنے اپنے احساسات سے واقف ہیں

مگر یہ رسم و رواج

آدمی سے آدمی کی تفریق کے۔۔۔

ہم دونوں محض اپنی آنکھوں کے علاوہ

ایک دوسرے کو چھو نہیں سکتے

آب زم زم یا گنگا جل

ایک رنگ، ایک خمار اور ایک احساس

کیوں نہ ہم دونوں

ایک آفاقی رشتے سے

منسلک ہو جائیں

ایسے رشتے سے

کہ جہاں تلواریں جھک جاتی ہیں

اور انگارے بن جاتے ہیں پھول

اور نیلا آسمان مسکرا اٹھتا ہے

آؤ آج

تم میری کلائی میں یہ راکھی باندھ دو

ہم دونوں اپنی اپنی

انوکھی چاہت کے حوالے سے

بن جائیں جنم جنم کے ساتھی

اٹوٹ ہو جائیں گے جب

پھر شاید زمانہ انگلی نہیں اٹھا سکے گا!!

ham jante hain

ye duniya hamen jine nahin degi

fasle ki diwaren

ham donon ke darmiyan

barhti rahengi

ye kaisa rishta hai

ham donon apne apne ehsasat se waqif hain

magar ye rasm-o-riwaj

admi se admi ki tafriq ke...

ham donon mahz apni ankhon ke alawa

ek dusre ko chhu nahin sakte

ab-e-zam zam ya ganga jal

ek rang, ek khumar aur ek ehsas

kyun na ham donon

ek afaqi rishte se

munsalik ho jaen

aise rishte se

ke jahan talwaren jhuk jati hain

aur angare ban jate hain phul

aur nila asman muskura uthta hai

ao aj

tum meri kalai mein ye rakhi bandh do

ham donon apni apni

anokhi chahat ke hawale se

ban jaen janam janam ke sathi

atut ho jaenge jab

phir shayad zamana ungli nahin utha sakega!!