سنو مادر ہند کے نونہالو

سنو مادر ہند کے نونہالو

صداقت پہ گردن کٹا لینے والو

اٹھو خواب غفلت مٹا لو مٹا لو

کمر بستہ ہو جاؤ ہمت بڑھا لو

تمہیں گام ہمت بڑھانا پڑے گا

وطن کا مقدر جگانا پڑے گا

ترقی کا بھارت کی نغمہ سنا دو

محبت کی گنگا دلوں میں بہا دو

جو خفتہ ہیں مدت سے ان کو جگا دو

صداقت کا دیدوں کی ڈنکا بجا دو

کرو جلد سیراب اجڑے چمن کو

لگیں چار چاند آج اپنے وطن کو

پڑے ہیں کہیں دین کی جاں کے لالے

کہیں دل ہلاتے ہیں بیکس کے نالے

ہوئے ہیں کہیں نیم جاں بھولے بھالے

مصیبت کے چکر میں ہیں ہند والے

چلا ہے کسی کے کلیجے پہ نشتر

دھواں آہ کا ہے کسی کے لبوں پر

بھروسہ زمیں کا نہ چرخ کہن کا

توکل ہے پر ماتما پر وطن کا

نظارہ ہے گلزار کشور میں بن کا

ہوا خار ہر پھول اپنے چمن کا

نہ چھوڑو مگر حوصلہ شیر مردو

اٹھو بیڑا منجھدار سے پار کر دو

شکایت کا کرنا نہیں یاد تم کو

نہیں عادت شور و فریاد تم کو

ستم گر کرے لاکھ برباد تم کو

کرے گردش چرخ ناشاد تم کو

ذرا کان پر جوں نہ رینگے تمہارے

چلیں گردنوں پہ جو خنجر دو دھارے

صدا ظلم کی آ رہی ہے جہاں سے

کہ ظاہر ہیں بیداد پیر و جواں سے

ٹپکتی ہیں گر حسرتیں اب یہاں سے

لپکتے ہیں شعلے ستم کے وہاں سے

مگر تم ہو اس پہ بھی محو قناعت

قناعت نہیں یہ ہے ضعف و کسالت

suno madar-e-hind ke naunihalo

sadaqat pe gardan kata lene walo

utho khwab-e-ghaflat mita lo mita lo

kamar basta ho jao himmat barha lo

tumhen gam himmat barhana parega

watan ka muqaddar jagana parega

taraqqi ka bharat ki naghma suna do

mohabbat ki ganga dilon mein baha do

jo khufta hain muddat se un ko jaga do

sadaqat ka didon ki danka baja do

karo jald sairab ujre chaman ko

lagen char chand aj apne watan ko

pare hain kahin din ki jan ke lale

kahin dil hilate hain bekas ke nale

hue hain kahin nim jan bhule bhale

musibat ke chakkar mein hain hind wale

chala hai kisi ke kaleje pe nashtar

dhuan ah ka hai kisi ke labon par

bharosa zamin ka na charkh-e-kuhan ka

tawakkul hai par matma par watan ka

nazara hai gulzar-e-kishwar mein ban ka

hawa khar har phul apne chaman ka

na chhoro magar hausla sher mardo

utho bera manjhdar se par kar do

shikayat ka karna nahin yad tum ko

nahin adat-e-shor-o-fariyad tum ko

sitam gar kare lakh barbad tum ko

kare gardish-e-charkh-e-nashad tum ko

zara kan par jun na renge tumhare

chalen gardanon pe jo khanjar do dhare

sada zulm ki a rahi hai jahan se

ke zahir hain bedad-e-pir-o-jawan se

tapakti hain gar hasraten ab yahan se

lapakte hain shole sitam ke wahan se

magar tum ho us pe bhi mahw-e-qanaat

qanaat nahin ye hai zof-o-kasalat