نند کے لال یشودا کے دلارے موہن

نند کے لال یشودا کے دلارے موہن

ہم تری یاد میں بیتاب ہیں سارے موہن

روتے روتے ہوئی بھگتوں کی ترے عمر بسر

کس مصیبت میں شب و روز گزارے موہن

نام لیوا ترے دنیا سے مٹے جاتے ہیں

جاں بہ لب ہیں تری آنکھوں کے ستارے موہن

جس کو کرتا تھا کلیجے سے گھڑی بھر نہ جدا

چھوڑ رکھا ہے اسے کس کے سہارے موہن

پھر وہی سانولی چھب آئے نظر بھگتوں کو

نند کی گود میں جمنا کے کنارے موہن

نند بابا کی کٹی ہو گئی سونی تجھ بن

پھیکے متھرا کے ہوئے سارے نظارے موہن

درد مندوں کو کلیجے سے لگانے والے

آفتابؔ آج مصیبت میں پکارے موہن

nand ke lal yashoda ke dulare mohan

ham tiri yad mein betab hain sare mohan

rote rote hui bhagaton ki tire umr basar

kis musibat mein shab-o-roz guzare mohan

nam lewa tire duniya se mite jate hain

jan ba lab hain tiri ankhon ke sitare mohan

jis ko karta tha kaleje se ghari bhar na juda

chhor rakha hai use kis ke sahare mohan

phir wahi sanwli chhab ae nazar bhagaton ko

nand ki god mein jamuna ke kinare mohan

nand baba ki kati ho gai suni tujh bin

phike mathra ke hue sare nazare mohan

dard mandon ko kaleje se lagane wale

aftab aj musibat mein pukare mohan