سوراج کا جھنڈا بھارت میں گڑوا دیا گاندھی بابا نے

سوراج کا جھنڈا بھارت میں گڑوا دیا گاندھی بابا نے

دل قوم و وطن کے دشمن کا دہلا دیا گاندھی بابا نے

الفت کی راہ میں مر جانا پر نام جہاں میں کر جانا

یہ پاٹھ وطن کے بچوں کو سکھلا دیا گاندھی بابا نے

اک دھرم کی طاقت دکھلا کر ظالم کے چھکے چھوڑوا کر

بھارت کا لوہا دنیا سے منوا دیا گاندھی بابا نے

اے قوم وطن کے پروانو لو اپنے فرض کو پہچانو

اب جیل سے یہ پیغام ہمیں بھجوا دیا گاندھی بابا نے

چرخے کی توپ چلا دو تم غیروں کے چھکے چھڑا دو تم

یہ ہند کا چکر سدرشن ہے سمجھا دیا گاندھی بابا نے

نفرت تھی غریبوں سے جن کو ہیں شاد اچھوتوں سے مل کر

اک پریم پیالا دنیا کو پلوا دیا گاندھی بابا نے

گرداب میں قوم کی کشتی تھی طوفان بپا تھے آفت کے

نیشن کا بیڑا ساحل پر لگوا دیا گاندھی بابا نے

بھگوان بھگت نے ہمت کی اک پریم جوالا جاگ اٹھی

کروا کر شیر و شکر سب کو دکھلا دیا گاندھی بابا نے

ہنس ہنس کر قوم کے بچوں نے سینوں پر گولیاں کھائی ہیں

بھارت کی رہ میں مر مٹنا سکھلا دیا گاندھی بابا نے

غیروں کے جھانسوں میں آنا دشوار ہے ہند کے لالوں کو

آنکھوں سے غفلت کا پردہ اٹھوا دیا گاندھی بابا نے

soraj ka jhanda bharat mein garwa diya gandhi baba ne

dil qaum-o-watan ke dushman ka dahla diya gandhi baba ne

ulfat ki rah mein mar jana par nam jahan mein kar jana

ye path watan ke bachchon ko sukhla diya gandhi baba ne

ik dharm ki taqat dikhla kar zalim ke chhake chhorwa kar

bharat ka loha duniya se manwa diya gandhi baba ne

ai qaum watan ke parwano lo apne farz ko pahchano

ab jel se ye paigham hamen bhijwa diya gandhi baba ne

charkhe ki top chala do tum ghairon ke chhake chhura do tum

ye hind ka chakkar sadrashan hai samjha diya gandhi baba ne

nafrat thi gharibon se jin ko hain shad achhuton se mil kar

ik prem piyala duniya ko palwa diya gandhi baba ne

girdab mein qaum ki kashti thi tufan bapa the afat ke

neshan ka bera sahil par lagwa diya gandhi baba ne

bhagwan bhagat ne himmat ki ik prem jwala jag uthi

karwa kar sher-o-shukr sab ko dikhla diya gandhi baba ne

hans hans kar qaum ke bachchon ne sinon par goliyan khai hain

bharat ki rah mein mar mitna sukhla diya gandhi baba ne

ghairon ke jhanson mein ana dushwar hai hind ke lalon ko

ankhon se ghaflat ka parda uthwa diya gandhi baba ne