میں کس منزل پہ آ پہنچا

میں کس منزل پہ آ پہنچا

یہاں تو چاندنی اوڑھے ہوئے

رستوں کا سناٹا

بہت ہی دور تک پھیلا ہوا ہے

مگر میں ذات کے گہرے قفس میں

نہ جانے کب سے قیدی ہوں خود اپنا

مرے ہاتھوں پہ یہ جو ریسماں ہے

گرہ میں اس کی آزادی کے پنچھی پھڑپھڑاتے تھے

مگر وہ بھی ہوئے بے دم

قفس کے در پہ بے مصرف خرد نے

کر لیا قبضہ

ہر اک دیوار حد آسماں معلوم ہوتی ہے

بہت اونچی فصیل ذات ہے اور شور گریہ ہے

میں اس سے بھاگ کر جاؤں کہاں پر

یہاں تو چاندنی اوڑھے ہوئے رستوں کا سناٹا

فصیل ذات کو دھمکا رہا ہے

کہیں روزن نہ ہو دیوار و در میں

یہ شور و غل کہیں باہر نہ جائے

main kis manzil pe a pahuncha

yahan to chandni orhe hue

raston ka sannata

bahut hi dur tak phaila hua hai

magar main zat ke gahre qafas mein

na jane kab se qaidi hun khud apna

mire hathon pe ye jo resman hai

girah mein us ki azadi ke panchhi pharpharate the

magar wo bhi hue be dam

qafas ke dar pe be masraf khirad ne

kar liya qabza

har ik diwar had asman maalum hoti hai

bahut unchi fasil-e-zat hai aur shor-e-girya hai

main us se bhag kar jaun kahan par

yahan to chandni orhe hue raston ka sannata

fasil-e-zat ko dhamka raha hai

kahin rauzan na ho diwar-o-dar mein

ye shor-o-ghul kahin bahar na jae