اب نہیں آؤں گا

اب نہیں آؤں گا

میں تمہارے کسی دام میں

اب نہیں آؤں گا

ایک مدت ہوئی

کشتئ دل کو جذبوں کے سیلاب سے

کھینچ لایا ہوں میں

اور آنکھوں میں شبنم کے بدلے

چمکتی ہوئی دھوپ ہے

دھوپ سے جسم سارا پگھل کر نئے روپ میں ڈھل گیا

اس نئے روپ میں کوئی خواہش نہیں

اس کڑی دھوپ میں کوئی سایہ نہیں

اور سائے کا ارمان بھی کس کو ہے

اس لیے

اے فراموش لمحو مجھے

پھر نہ آواز دو

ab nahin aunga

main tumhare kisi dam mein

ab nahin aunga

ek muddat hui

kashti-e-dil ko jazbon ke sailab se

khinch laya hun main

aur ankhon mein shabnam ke badle

chamakti hui dhup hai

dhup se jism sara pighal kar nae rup mein dhal gaya

is nae rup mein koi khwahish nahin

is kari dhup mein koi saya nahin

aur sae ka arman bhi kis ko hai

is liye

ai faramosh lamho mujhe

phir na awaz do