یہ مجھ میں کون ہے

یہ مجھ میں کون ہے

کہ جب بھی گردش لہو نے

میرے جسم کی حرارتیں

ہر اک رگ حیات میں اتار دیں

تو اس کی خود کلامیوں نے

نیند کی سیاہ چادریں سمیٹ لیں

سماعتوں کی رہ گزر میں

اس کی گفتگو کے قافلے رکے

تو دشت زندگی پہ

ابر کا غلاف آ گیا

سکوت زندگی میں جیسے انقلاب آ گیا

میں اس سے پوچھتا رہا

کہ کب تلک یہ مرگ و زیست کی مصیبتیں

فراق و وصل کی صعوبتیں

مرے وجود پر رہیں گی خیمہ زن

مگر مرے سوال پر

یا میری عرض حال پر

نزول حرف آگہی نہ ہو سکا

وہ مجھ میں اصل ذات کی طرح رہا مگر کبھی

یہ منکشف نہ ہو سکا

کہ اس خیام ذات میں مرے سوا یہ کون ہے

اک اجنبی سا آشنا

یہ مجھ میں کون ہے

ye mujh mein kaun hai

ke jab bhi gardish lahu ne

mere jism ki hararaten

har ik rag-e-hayat mein utar den

to us ki khud kalamiyon ne

nind ki siyah chadaren samet len

samaaton ki rah guzar mein

us ki guftugu ke qafile ruke

tu dasht-e-zindagi pe

abr ka ghilaf a gaya

sukut-e-zindagi mein jaise inqilab a gaya

main us se puchhta raha

ke kab talak ye marg-o-zist ki musibaten

firaq-o-wasl ki suubaten

mire wajud par rahengi khema zan

magar mire sawal par

ya meri arz-e-hal par

nuzul harf agahi na ho saka

wo mujh mein asl zat ki tarah raha magar kabhi

ye munkashif na ho saka

ke is khayyam zat mein mire siwa ye kaun hai

ik ajnabi sa ashna

ye mujh mein kaun hai