میں کیا لکھوں

میں کیا لکھوں

تمہارے واسطے

اے نیم جان و سوختہ تن

وادیٔ قتل اماں کے باسیو

میں کیا لکھوں

کوئی نوحہ تمہارے روبرو

شرمندۂ تاثیر نہ ہوگا

کوئی حرف‌ حکایت

صبر کی تصویر نہ ہوگا

یہی تو جاگتی آنکھوں سے تم نے خواب دیکھے تھے

کہ اس بنجر زمیں پر اپنے خوں کی فصل ٹانکو گے

ہر اک منظر میں امن و آشتی کے رنگ پھیلا کر

ہر اک چہرے کو نور اطمینان قلب بانٹو گے

اسی بنجر زمیں پہ خاک و خوں میں آج غلطاں ہو

تو پھر کیوں سر بریدہ شاخ کی مانند بے جاں ہو

یہ ہونا تھا تو کیوں پھر اس کے ہو جانے پہ حیراں ہو

مرے لوگو

تمہاری بند آنکھیں

جاگتی آنکھوں کے خوابوں کی

تمہیں تعبیر دیتی ہیں

اسی بنجر زمیں میں

قبر کی جاگیر دیتی ہیں

main kya likhun

tumhare waste

ai nim jan-o-sokhta tan

wadi-e-qatl aman ke basiyo

main kya likhun

koi nauha tumhare rubaru

sharminda-e-tasir na hoga

koi harf-e-hikayat

sabr ki taswir na hoga

yahi to jagti ankhon se tum ne khwab dekhe the

ke is banjar zamin par apne khun ki fasl tankoge

har ik manzar mein amn-o-ashti ke rang phaila kar

har ik chehre ko nur-e-itminan qalb bantoge

isi banjar zamin pe khak-o-khun mein aj ghaltan ho

to phir kyun sar burida shakh ki manind-e-be jan ho

ye hona tha to kyun phir us ke ho jane pe hairan ho

mire logo

tumhari band ankhen

jagti ankhon ke khwabon ki

tumhen taabir deti hain

isi banjar zamin mein

qabr ki jagir deti hain