مذہبی چنگاریوں سے بستیاں جل جائیں گی

مذہبی چنگاریوں سے بستیاں جل جائیں گی

ان چراغوں سے نہ الجھو انگلیاں جل جائیں گی

آگ گلشن میں لگا دی اور سوچا بھی نہیں

ان گلوں کے ساتھ کتنی تتلیاں جل جائیں گی

نفرتوں کی آندھیاں یوں ہی اگر چلتی رہی

راکھ میں پنہاں ہیں جو چنگاریاں جل جائیں گی

آسمانوں کو جلا کر ایک دن پچھتاؤ گے

جل اٹھا ساون تو ساری بدلیاں جل جائیں گی

کوئی شور و غل نہ سناٹوں کا پھر ہوگا وجود

ساتھ ہی آواز کے خاموشیاں جل جائیں گی

یوں ہی گر تنہائیوں کے دائرے بڑھتے گئے

آدمی رہ جائے گا پرچھائیاں جل جائیں گی

پھر محبت کے الاؤں کو نفس روشن کرو

دھیمی دھیمی آنچ میں سب تلخیاں جل جائیں گی

mazhabi chingariyon se bastiyan jal jaengi

in charaghon se na uljho ungliyan jal jaengi

ag gulshan mein laga di aur socha bhi nahin

in gulon ke sath kitni titliyan jal jaengi

nafraton ki andhiyan yun hi agar chalti rahi

rakh mein pinhan hain jo chingariyan jal jaengi

asmanon ko jala kar ek din pachhtaoge

jal utha sawan to sari badliyan jal jaengi

koi shor-o-ghul na sannaton ka phir hoga wajud

sath hi awaz ke khamoshiyan jal jaengi

yun hi gar tanhaiyon ke daire barhte gae

admi rah jaega parchhaiyan jal jaengi

phir mohabbat ke illaon ko nafas raushan karo

dhimi dhimi anch mein sab talkhiyan jal jaengi