اب کسی کو کیا بتائیں کس قدر نادان تھے

اب کسی کو کیا بتائیں کس قدر نادان تھے

ہم وہیں کشتی کو لے آئے جہاں طوفان تھے

کچھ تڑپتی آرزوئیں چند بے معنی سوال

کارواں میں سب کے سر پر بس یہی سامان تھے

ہم نے اس دنیا کے مے خانہ میں یے دیکھا فریب

بس وہی پیاسے رہے جو صاحب ایمان تھے

زلزلوں پر آ گیا الزام اچھا ہی ہوا

ورنہ اس تخریب کے پہلے سے بھی امکان تھے

ان غموں نے دل میں صدیوں کے وسیلے کر لئے

جو فقط دو چار دن کے واسطے مہمان تھے

بس یہی سچ ہے کہ ہم اب ان کی محکومی میں ہیں

جو نفسؔ اپنی حویلی میں کبھی دربان تھے

ab kisi ko kya bataen kis qadar nadan the

ham wahin kashti ko le ae jahan tufan the

kuchh tarapti arzuen chand be maani sawal

karwan mein sab ke sar par bas yahi saman the

ham ne is duniya ke mai khana mein ye dekha fareb

bas wahi pyase rahe jo sahab-e-iman the

zalzalon par a gaya ilzam achchha hi hua

warna is takhrib ke pahle se bhi imkan the

in ghamon ne dil mein sadiyon ke wasile kar liye

jo faqat do char din ke waste mehman the

bas yahi sach hai ke ham ab un ki mahkumi mein hain

jo nafas apni haweli mein kabhi darban the