Arooz is now on the App Store, for iPhone and iPad. Download →

All poetry

جنوں ہے ذہن میں تو حوصلے تلاش کرو

Nafas Ambalvi (b. 1961)

جنوں ہے ذہن میں تو حوصلے تلاش کرو

مثال آب رواں راستے تلاش کرو

یہ اضطراب رگوں میں بہت ضروری ہے

اٹھو سفر کے نئے سلسلے تلاش کرو

یہ سر زمین سفر کے لئے بہت کم ہے

چلو افق پہ نئے مرحلے تلاش کرو

جو تھک گئے ہو یہ بوسیدہ زندگی جی کر

تو زندگی کے الگ زاویے تلاش کرو

جو چاہتے ہو کہ اخبار چل پڑے اپنا

تو سرخیوں کے لئے حادثے تلاش کرو

یہ تنگ ذوق ادیبوں سے خوش نہیں ہوں گے

مشاعرے کے لئے مسخرے تلاش کرو

خدا پہ چھوڑ دو یہ کل کوئی پڑھے نہ پڑھے

نئی غزل کے لئے قافیے تلاش کرو