بازی اگرچہ زیست کی ہم ہار تو گئے

بازی اگرچہ زیست کی ہم ہار تو گئے

لیکن جو دل پہ نقش تھے آزار تو گئے

کتنے شناوروں کو یہ دریا نگل گیا

طغیانیوں میں ڈوب کے ہم پار تو گئے

بارش کا زور ہے مرے خستہ مکان پر

لگتا ہے اب کے یہ در و دیوار تو گئے

ہم لوگ اب قدیم نمائش کی چیز ہیں

بازار سے اب اپنے خریدار تو گئے

وہ درمیاں غزل کے جو اٹھ کر چلا گیا

اے بزم شاعری ترے معیار تو گئے

لگتا ہے اب کے جان ہی جائے گی ایک دن

اس شاعری کے شوق میں گھر بار تو گئے

چل اے نفسؔ کہ ہم بھی کہیں اور جا بسیں

دو چار تھے جو شہر میں غم خوار تو گئے

bazi agarche zist ki ham har to gae

lekin jo dil pe naqsh the azar to gae

kitne shanaoron ko ye dariya nigal gaya

tughyaniyon mein dub ke ham par to gae

barish ka zor hai mire khasta makan par

lagta hai ab ke ye dar-o-diwar to gae

ham log ab qadim numaish ki chiz hain

bazar se ab apne kharidar to gae

wo darmiyan ghazal ke jo uth kar chala gaya

ai bazm-e-shayari tire meyar to gae

lagta hai ab ke jan hi jaegi ek din

is shayari ke shauq mein ghar bar to gae

chal ai nafas ke ham bhi kahin aur ja basen

do char the jo shahr mein gham khwar to gae