سنا تھا نیزہ و تلوار و خنجر بیچ ڈالے ہیں

سنا تھا نیزہ و تلوار و خنجر بیچ ڈالے ہیں

مگر ظل الٰہی نے تو لشکر بیچ ڈالے ہیں

پڑی ہیں ریت کے ٹیلوں پہ ٹوٹی کشتیاں اپنی

ہوا ہے اب کے موجوں نے سمندر بیچ ڈالے ہیں

اگر وہ میری آنکھیں بیچ دیتا تو مناسب تھا

مگر اس نے تو ان آنکھوں کے منظر بیچ ڈالے ہیں

کسی نے احتراماً اک عجائب گھر کے کمرے میں

ہمارے جسم رکھے ہیں مگر سر بیچ ڈالے ہیں

محبت سے بھرے خط بھیجتے رہتے تھے جو اکثر

اب ان لوگوں نے بھی اپنے کبوتر بیچ ڈالے ہیں

کسی دن اپنے بچوں سے لپٹ کر روئیں گے ناداں

جنہوں نے شہر جا کر گاؤں کے گھر بیچ ڈالے ہیں

یہ وہ احسان ہے تجھ سے جو مرتے دم نہ اترے گا

کہ تیری پرورش میں ماں نے زیور بیچ ڈالے ہیں

suna tha neza-o-talwar-o-khanjar bech dale hain

magar zill-e-ilahi ne to lashkar bech dale hain

pari hain ret ke tilon pe tuti kashtiyan apni

hua hai ab ke maujon ne samundar bech dale hain

agar wo meri ankhen bech deta to munasib tha

magar us ne to in ankhon ke manzar bech dale hain

kisi ne ahtarama ik ajaib ghar ke kamre mein

hamare jism rakhe hain magar sar bech dale hain

mohabbat se bhare khat bhejte rahte the jo aksar

ab un logon ne bhi apne kabutar bech dale hain

kisi din apne bachchon se lipat kar roenge nadan

jinhon ne shahr ja kar gaon ke ghar bech dale hain

ye wo ehsan hai tujh se jo marte dam na utrega

ke teri parwarish mein man ne zewar bech dale hain