اب نہ میں ہوں نہ مرا غم ہے نہ جاں باقی ہے

اب نہ میں ہوں نہ مرا غم ہے نہ جاں باقی ہے

زندگی بس ترے ہونے کا گماں باقی ہے

اتنا خوش بھی نہ ہو اے مجھ کو جلانے والے

دیکھ جل کر بھی ابھی مجھ میں دھواں باقی ہے

میری مشکل کہ میں خود اپنی زباں کاٹ چکا

اس کو یہ ڈر کہ ابھی میرا بیاں باقی ہے

کچھ تو اس بار بہاروں نے بھی ڈھائے ہیں ستم

اس پہ یہ جبر کہ موسم میں خزاں باقی ہے

جسم کے ساتھ تمنا بھی گئی حسرت بھی

اب یہاں کوئی مکیں ہے نہ مکاں باقی ہے

مجھ کو اب پہلے سی نسبت بھی نہیں ہے تجھ سے

اب تجھے مجھ سے محبت بھی کہاں باقی ہے

ab na main hun na mira gham hai na jan baqi hai

zindagi bas tire hone ka guman baqi hai

itna khush bhi na ho ai mujh ko jalane wale

dekh jal kar bhi abhi mujh mein dhuan baqi hai

meri mushkil ke main khud apni zaban kat chuka

us ko ye dar ke abhi mera bayan baqi hai

kuchh to is bar baharon ne bhi dhae hain sitam

us pe ye jabr ke mausam mein khizan baqi hai

jism ke sath tamanna bhi gai hasrat bhi

ab yahan koi makin hai na makan baqi hai

mujh ko ab pahle si nisbat bhi nahin hai tujh se

ab tujhe mujh se mohabbat bhi kahan baqi hai