بات کرتے ہو تو تکرار کی بو آتی ہے

بات کرتے ہو تو تکرار کی بو آتی ہے

یار تم سے کسی بیمار کی بو آتی ہے

چائے کے ساتھ یہ خبریں نہ پڑھا کر ورنہ

منہ سے دن بھر اسی اخبار کی بو آتی ہے

آپ کہہ کر نہ ہو تو مجھ سے مخاطب اے دوست

مجھ کو اس لفظ سے اغیار کی بو آتی ہے

تیری گفتار سے ہوتا ہے تجارت کا گماں

تیرے لہجے سے خریدار کی بو آتی ہے

پہلے خوشبو کی طرح لوگ مہکتے تھے یہاں

اب تو گرتے ہوئے معیار کی بو آتی ہے

وہ جو اس شہر میں کچھ لوگ ہیں اجلے اجلے

اب مجھے ان سے گنہ گار کی بو آتی ہے

تیرے اخلاق میں اک مشک فشانی ہے نفسؔ

تیرے کردار سے خوددار کی بو آتی ہے

bat karte ho to takrar ki bu ati hai

yar tum se kisi bimar ki bu ati hai

chae ke sath ye khabren na parha kar warna

munh se din bhar isi akhbar ki bu ati hai

ap kah kar na ho to mujh se mukhatib ai dost

mujh ko is lafz se aghyar ki bu ati hai

teri guftar se hota hai tijarat ka guman

tere lahje se kharidar ki bu ati hai

pahle khushbu ki tarah log mahakte the yahan

ab to girte hue meyar ki bu ati hai

wo jo is shahr mein kuchh log hain ujle ujle

ab mujhe un se gunah gar ki bu ati hai

tere akhlaq mein ik mushk fishani hai nafas

tere kirdar se khuddar ki bu ati hai