ہم شہر محبت کو بسانے میں لگے ہیں

ہم شہر محبت کو بسانے میں لگے ہیں

کچھ لوگ مگر آگ لگانے میں لگے ہیں

تاریخ تو تاریخ ہے ہرگز نہ مٹے گی

ناداں ہیں جو تاریخ مٹانے میں لگے ہیں

افسوس کہ اس جنگ میں اب ظل الٰہی

خود اپنے ہی لشکر کو ہرانے میں لگے ہیں

وہ ہے کہ کہانی ہی بدلنے پہ تلا ہے

اور ہم ہیں کہ کردار نبھانے میں لگے ہیں

کچھ درد تو ظلمت نے دئے ہیں ہمیں لیکن

کچھ زخم چراغوں کو جلانے میں لگے ہیں

لوٹے ہیں تو اب ساتھ فقط گرد سفر ہے

اب جا کے کہیں ہوش ٹھکانے میں لگے ہیں

جو بات نفسؔ سارے زمانے پہ عیاں تھی

ہم ہیں کہ وہی بات بتانے میں لگے ہیں

ham shahr mohabbat ko basane mein lage hain

kuchh log magar ag lagane mein lage hain

tarikh to tarikh hai hargiz na mitegi

nadan hain jo tarikh mitane mein lage hain

afsos ke is jang mein ab zill-e-ilahi

khud apne hi lashkar ko harane mein lage hain

wo hai ke kahani hi badalne pe tala hai

aur ham hain ke kirdar nibhane mein lage hain

kuchh dard to zulmat ne diye hain hamen lekin

kuchh zakhm charaghon ko jalane mein lage hain

laute hain to ab sath faqat gard-e-safar hai

ab ja ke kahin hosh thikane mein lage hain

jo bat nafas sare zamane pe ayan thi

ham hain ke wahi bat batane mein lage hain