Arooz is now on the App Store, for iPhone and iPad. Download →

All poetry

راز الم سے ہے شاید کہ مرا راز جدا

Firaq Gorakhpuri (1896–1982)

راز الم سے ہے شاید کہ مرا راز جدا

مجھ سے ملنے میں ہے اس آنکھ کا انداز جدا

کوئی ایسی نفسوں سے بھی ہو دم ساز جدا

دل کا انداز جدا ساز جدا راز جدا

بد گماں عشق کو صد وہم و یقیں کے کھٹکے

شوخیٔ چشم سخن ساز ہے غماز جدا

یوں ہی کیا کم ہے تری یاد کہ دل کو چھیڑیں

زلف پر خم لب رنگیں نگۂ ناز جدا

عقدۂ پیچ و خم زلف کا کھلنا معلوم

راز الم سے ہے یہ سلسلۂ راز جدا

تنگئ و وسعت کونین میں نسبت کیسی

در توبہ سے در میکدہ ہو باز جدا

آہ و زاری سے کبھی ساز محبت نہ چھڑا

غم کا انداز جدا عشق کا انداز جدا

حسن کی شاہ تلون ادھر اک آفت جان

واہمے دل کے ادھر تفرقہ پرواز جدا

برق آواز جلا دے یہ نیستان جہاں

ساز ہستی سے ہے ساز لب اعجاز جدا

بڑھتے بھی جاتے ہیں سب اہل جہاں سوئے عدم

عمر رفتہ بھی دئے جاتی ہے آواز جدا

پے بہ پے اڑتے ہوئے ہوش کے انداز الگ

طرز برق‌‌ نگۂ حسن‌‌ جنوں ساز جدا

نگۂ ناز دئے جاتی ہے پیغام حیات

موت سے کھیل رہے ہیں ترے جانباز جدا

کچھ اشارے ہیں ادھر شوخی پنہاں کے فراقؔ

ہے سکوت‌ نگۂ ناز سخن ساز جدا