زباں سے بے تعلق دل کو بزم یار میں دیکھا

زباں سے بے تعلق دل کو بزم یار میں دیکھا

تعجب خیز ضبط اس محرم اسرار میں دیکھا

ادھر تسبیح کی گردش میں پایا شیخ صاحب کو

برہمن کو ادھر الجھا ہوا زنار میں دیکھا

وہ بانکا قاتل آئینے کی کچھ پروا نہیں کرتا

کبھی دیکھا بھی اپنا عکس اگر تلوار میں دیکھا

زمانہ نے مرے آگے بھی دنیا پیش کر دی تھی

مگر میں نے تو اپنا فائدہ انکار میں دیکھا

zaban se be taalluq dil ko bazm-e-yar mein dekha

taajjub khez zabt is mahram-e-asrar mein dekha

idhar tasbih ki gardish mein paya shaikh sahab ko

barahman ko idhar uljha hua zunnar mein dekha

wo banka qatil aine ki kuchh parwa nahin karta

kabhi dekha bhi apna aks agar talwar mein dekha

zamana ne mire age bhi duniya pesh kar di thi

magar main ne to apna faida inkar mein dekha