عالم ہے بے خودی کا مے کی دکان پر ہیں

عالم ہے بے خودی کا مے کی دکان پر ہیں

ساقی پہ ہیں نگاہیں ہوش آسمان پر ہیں

دل اپنی ضد پہ قائم وہ اپنی آن پر ہیں

جتنی مصیبتیں ہیں سب میری جان پر ہیں

دنیا بدل گئی ہے وہ ہیں ہمیں کہ اب تک

اپنے مقام پر ہیں اپنے مکان پر ہیں

یہ صورتیں تمہاری یہ ناز یہ ادائیں

قربان اے بتو ہم خالق کی شان پر ہیں

شکر خدا کہ ان کے قدموں پہ سر ہے اپنا

اس وقت کچھ نہ پوچھو ہم آسمان پر ہیں

اب تک سمجھ رہے ہیں دل میں مجھے مسلماں

قائم ہنوز یہ بت اپنے گمان پر ہیں

اسلوب نظم اکبرؔ فطرت سے ہے قریں تر

الفاظ ہیں محل پر معنی مکان پر ہیں

alam hai be khudi ka mai ki dukan par hain

saqi pe hain nigahen hosh asman par hain

dil apni zid pe qaim wo apni an par hain

jitni musibaten hain sab meri jan par hain

duniya badal gai hai wo hain hamen ke ab tak

apne maqam par hain apne makan par hain

ye suraten tumhari ye naz ye adaen

qurban ai buto ham khaliq ki shan par hain

shukr-e-khuda ke un ke qadmon pe sar hai apna

is waqt kuchh na puchho ham asman par hain

ab tak samajh rahe hain dil mein mujhe musalman

qaim hanoz ye but apne guman par hain

uslub-e-nazm akbar fitrat se hai qarin tar

alfaz hain mahal par maani makan par hain