الجھا نہ مرے آج کا دامن کبھی کل سے

الجھا نہ مرے آج کا دامن کبھی کل سے

مانگی نہ مرے دل نے مدد طول امل سے

ان کی نگہ مست ہے لبریز معانی

ملتی ہوئی تاثیر میں حافظؔ کی غزل سے

ادراک نے آنکھیں شب اوہام میں کھولیں

واقف نہ ہوا روشنیٔ صبح ازل سے

درجہ متحیر کا ہے بے خود سے فروتر

ہے روح کو امید ترقی کی اجل سے

بحث کہن و نو میں سمجھتا نہیں اکبرؔ

جو ذرہ ہے موجود ہے وہ روز ازل سے

uljha na mire aj ka daman kabhi kal se

mangi na mire dil ne madad tul-e-amal se

un ki nigah-e-mast hai labrez maani

milti hui tasir mein hafiz ki ghazal se

idrak ne ankhen shab auham mein kholen

waqif na hua raushni-e-subh-e-azal se

darja mutahayyir ka hai be khud se farotar

hai ruh ko ummid taraqqi ki ajal se

bahs-e-kuhan-o-nau mein samajhta nahin akbar

jo zarra hai maujud hai wo roz-e-azal se