ہستیٔ حق کے معانی جو مرا دل سمجھا

ہستیٔ حق کے معانی جو مرا دل سمجھا

اپنی ہستی کو اک اندیشۂ باطل سمجھا

وہ شناور ہوں جو ہر موج کو ساحل سمجھا

وہ مسافر ہوں جو ہر گام کو منزل سمجھا

کافری سحر نہ تھی عشق بتاں کھیل نہ تھا

بہ خدا میں تو اسی سے اسے مشکل سمجھا

اترا دریا میں پئے غسل جو وہ غیرت گل

شور امواج کو میں شور عنادل سمجھا

کفر و اسلام کی تفریق نہیں فطرت میں

یہ وہ نقطہ ہے جسے میں بھی بہ مشکل سمجھا

شیخ نے چشم حقارت سے جو دیکھا مجھ کو

بہ خدا میں اسے اللہ سے غافل سمجھا

نہ کیا یار نے اکبرؔ کے جنوں کو تسلیم

مل گئی آنکھ تو کچھ سوچ کے عاقل سمجھا

hasti-e-haq ke maani jo mira dil samjha

apni hasti ko ik andesha-e-batil samjha

wo shanaor hun jo har mauj ko sahil samjha

wo musafir hun jo har gam ko manzil samjha

kafiri sehr na thi ishq-e-butan khel na tha

ba khuda mein to usi se use mushkil samjha

utra dariya mein piye ghusl jo wo ghairat-e-gul

shor amwaj ko main shor-e-anadil samjha

kufr-o-islam ki tafriq nahin fitrat mein

ye wo nuqta hai jise main bhi ba mushkil samjha

shaikh ne chashm-e-hiqarat se jo dekha mujh ko

ba khuda mein use allah se ghafil samjha

na kiya yar ne akbar ke junun ko taslim

mil gai ankh to kuchh soch ke aqil samjha