کتنے طوفانوں کی حامل تھی لہو کی اک بوند

کتنے طوفانوں کی حامل تھی لہو کی اک بوند

دل میں اک لہر اٹھی آنکھ سے دریا برسا

کوئی غرقاب کوئی ماہیٔ بے آب ہوا

ابر بے فیض جو برسا بھی تو کیسا برسا

چڑھتے دریاؤں میں طوفان اٹھانے والے

چند بوندیں ہی سر دامن صحرا برسا

طنز ہیں سوختہ جانوں پہ گرجتے بادل

یا تو گھنگھور گھٹائیں نہ اٹھا یا برسا

ابر و باراں کے خدا جھومتا بادل نہ سہی

آگ ہی اب سر گلزار تمنا برسا

اپنی قسمت کہ گھٹاؤں میں بھی جلتے ہیں فرازؔ

اور جہاں وہ ہیں وہاں ابر کا سایہ برسا

kitne tufanon ki hamil thi lahu ki ik bund

dil mein ik lahr uthi ankh se dariya barsa

koi gharqab koi mahi-e-be ab hua

abr-e-be faiz jo barsa bhi to kaisa barsa

charhte dariyaon mein tufan uthane wale

chand bunden hi sar-e-daman-e-sahra barsa

tanz hain sokhta janon pe garajte badal

ya to ghanghor ghataen na utha ya barsa

abr-o-baran ke khuda jhumta badal na sahi

ag hi ab sar-e-gulzar-e-tamanna barsa

apni qismat ke ghataon mein bhi jalte hain faraz

aur jahan wo hain wahan abr ka saya barsa