عقل وہ ناصح کہ ہر دم لغزش پا کا خیال

عقل وہ ناصح کہ ہر دم لغزش پا کا خیال

دل وہ دیوانہ یہی چاہے کہ نادانی کرے

ہاں مجھے بھی ہو گلہ بے مہریٔ حالات کا

تجھ کو آزردہ اگر میری پریشانی کرے

یہ تو اک شہر جنوں ہے چاک دامانو یہاں

سب کے سب وحشی ہیں کس کو کون زندانی کرے

موسم گل ہے مگر بے رنگ ہے شاخ مژہ

کتنا شرمندہ ہمیں آنکھوں کی ویرانی کرے

ہنستے چہروں سے دلوں کے زخم پہچانے گا کون

تجھ سے بڑھ کر ظلم اپنی خندہ پیشانی کرے

ناصحوں کو کون سمجھائے نہ سمجھے گا فرازؔ

وہ تو سب کی بات سن لے اور من مانی کرے

aql wo naseh ke har dam laghzish-e-pa ka khayal

dil wo diwana yahi chahe ke nadani kare

han mujhe bhi ho gila be mehri-e-halat ka

tujh ko azurda agar meri pareshani kare

ye to ik shahr-e-junun hai chak damanu yahan

sab ke sab wahshi hain kis ko kaun zindani kare

mausam-e-gul hai magar be rang hai shakh-e-mizha

kitna sharminda hamen ankhon ki wirani kare

hanste chehron se dilon ke zakhm pahchanega kaun

tujh se barh kar zulm apni khanda peshani kare

nasihon ko kaun samjhae na samjhega faraz

wo to sab ki bat sun le aur man mani kare