خوش وحشتے کہ عرضِ جنونِ فنا کروں

خوش وحشتے کہ عرضِ جنونِ فنا کروں

جوں گردِ راہ جامۂ ہستی قبا کروں

گر بعدِ مرگ وحشتِ دل کا گلہ کروں

موجِ غبار سے پرِ یک دشت وا کروں

آ اے بہارِ ناز کہ تیرے خرام سے

دستار گردِ شاخِ گلِ نقشِ پا کروں

خوش اوفتادگی کہ بہ صحرائے انتظار

جوں جادہ گردِ رہ سے نگہ سرمہ سا کروں

صبر اور یہ ادا کہ دل آوے اسیرِ چاک

درد اور یہ کمیں کہ رہِ نالہ وا کروں

وہ بے دماغِ منتِ اقبال ہوں کہ میں

وحشت بہ داغِ سایۂ بالِ ہما کروں

وہ التماسِ لذتِ بیداد ہوں کہ میں

تیغِ ستم کو پشتِ خمِ التجا کروں

وہ رازِ نالہ ہوں کہ بہ شرحِ نگاہِ عجز

افشاں غبارِ سرمہ سے فردِ صدا کروں

لوں وام بختِ خفتہ سے یک خوابِ خوش ولے

غالبؔ یہ خوف ہے کہ کہاں سے ادا کروں

khush wahshate ke arz-e-junun-e-fana karun

jun gard-e-rah jama-e-hasti qaba karun

gar baad-e-marg wahshat-e-dil ka gila karun

mauj-e-ghubar se par-e-yak dasht wa karun

a ai bahar-e-naz ke tere khiram se

dastar gard-e-shakh-e-gul-e-naqsh-e-pa karun

khush ofatadagi ke ba sahra-e-intizar

jun jada gard-e-rah se nigah surma sa karun

sabr aur ye ada ke dil awe asir-e-chak

dard aur ye kamin ke rah-e-nala wa karun

wo be dimagh-e-minnat-e-iqbal hun ke main

wahshat ba dagh-e-saya-e-bal-e-huma karun

wo iltimas-e-lazzat-e-bedad hun ke main

tegh-e-sitam ko pusht-e-kham-e-iltija karun

wo raz-e-nala hun ke ba sharh-e-nigah-e-ijz

afshan ghubar-e-surma se fard-e-sada karun

lun wam bakht-e-khufta se yak khwab-e-khush wale

ghalib ye khauf hai ke kahan se ada karun