فرو پیچیدنی ہے فرش بزمِ عیش گستر کا

فرو پیچیدنی ہے فرش بزمِ عیش گستر کا

دریغا گردش آموزِ فلک ہے دور ساغر کا

خطِ نوخیز کی آئینے میں دی کس نے آرائش

کہ ہے تہ بندیٔ پر ہائے طوطی رنگ جوہر کا

گیا جو نامہ بر واں سے بہ رنگِ باختہ آیا

خطوطِ روئے قالیں نقش ہے پشتِ کبوتر کا

شکستِ گوشہ گیراں ہے محرم کو حاصل گردش

صدف سے آسیائے آب میں ہے دانہ گوہر کا

فزوں ہوتا ہے ہر دم جوشِ خونباری تماشا ہے

نفس کرتا ہے رگ ہائے مژہ پر کام نشتر کا

خیالِ شربتِ عیسیٰ گدازِ تر جبینی ہے

اسدؔ ہوں مستِ دریا بخشیٔ ساقیٔ کوثر کا

faro pechidini hai farsh-e-bazm-e-aish gustar ka

daregha gardish amoz-e-falak hai daur-e-saghar ka

khat-e-naukhez ki aine mein di kis ne araish

ke hai tah bandi-e-pur hae tuti rang jauhar ka

gaya jo nama bar wan se ba rang-e-bakhta aya

khutut-e-ru-e-qalin naqsh hai pusht-e-kabutar ka

shikast-e-gosha giran hai mahram ko hasil-e-gardish

sadaf se asiya-e-ab mein hai dana gauhar ka

fuzun hota hai har dam josh-e-khunbari tamasha hai

nafas karta hai rag ha-e-mizha par kam nashtar ka

khayal-e-sharbat-e-isa gudaz-e-tar jabini hai

asad hun mast-e-dariya bakhshi-e-saqi-e-kausar ka