کرے گر حیرتِ نظارہ طوفاں نکتہ گوئی کا

کرے گر حیرتِ نظارہ طوفاں نکتہ گوئی کا

حبابِ چشمۂ آئینہ ہو وے بیضہ طوطی کا

بہ روئے قیس دستِ شرم ہے مژگانِ آہو سے

مگر روزِ عروسی گم ہوا تھا شانہ لیلی کا

فسانِ تیغِ نازک قاتلاں سنگِ جراحت ہے

دلِ گرمِ تپش قاصد ہے پیغامِ تسلی کا

نہیں گرداب جز سر گشتگی ہائے طلب ہرگز

حبابِ بحر کے ہے آبلوں میں خار ماہی کا

نیازِ جلوہ ریزی طاقتِ بالیں شکستن ہا

تکلف کو خیال آیا ہو گر بیمار پرسی کا

نہ بخشی فرصتِ یک شبنمستاں جلوۂ خور نے

تصور نے کیا ساماں ہزار آئینہ بندی کا

اسد تاثیرِ صافی ہائے حیرت جلوہ پرور ہو

گر آبِ چشمۂ آئینہ دھوئے عکس زنگی کا

kare gar hairat-e-nazzara tufan nukta goi ka

habab-e-chashma-e-aina ho we baiza tuti ka

ba ru-e-qais dast-e-sharm hai mizhgan-e-ahu se

magar roz-e-urusi gum hua tha shana laila ka

fasan-e-tegh-e-nazuk qatilan sang-e-jarahat hai

dil-e-garm-e-tapish qasid hai paigham-e-tasalli ka

nahin girdab juz sar gashtagi hae talab hargiz

habab-e-bahr ke hai ablon mein khar-e-mahi ka

niyaz-e-jalwa rezi taqat-e-balin shaksatan ha

takalluf ko khayal aya ho gar bimar parsi ka

na bakhshi fursat-e-yak shabnamsitan jalwa-e-khur ne

tasawwur ne kiya saman hazar aina bandi ka

asad tasir-e-safi hae hairat jalwa parwar ho

gar ab-e-chashma-e-aina dhoe aks zangi ka