ہوئی ہیں آب شرمِ کوششِ بے جا سے تدبیریں

ہوئی ہیں آب شرمِ کوششِ بے جا سے تدبیریں

عرق ریزِ تپش ہیں موج کی مانند زنجیریں

خیالِ سادگی ہائے تصور نقشِ حیرت ہے

پرِ عنقا پہ رنگِ رفتہ سے کھینچی ہیں تصویریں

ز بس ہر شمع یاں آئینۂ حیرت پرستی ہے

کرے ہیں غنچۂ منقارِ طوطی نقش گل گیریں

سپند آہنگیٔ ہستی و سعیٔ نالہ فرسائی

غبار آلودہ ہیں جوں دودِ شمعِ کشتہ تقریریں

ہجومِ سادہ لوحی پنبۂ گوشِ حریفاں ہے

وگرنہ خواب کی مضمر ہیں افسانے میں تعبیریں

بتانِ شوخ کی تمکینِ بعد از قتل کی حیرت

بیاضِ دیدۂ نخچیر پر کھینچے ہے تصویریں

اسدؔ طرزِ عروجِ اضطرابِ دل کو کیا کہیے

سمجھتا ہوں تپش کو الفتِ قاتل کی تاثیریں

hui hain ab sharm-e-koshish-e-be ja se tadbiren

araq rez-e-tapish hain mauj ki manind zanjiren

khayal-e-sadgi ha-e-tasawwur naqsh-e-hairat hai

par-e-anqa pe rang-e-rafta se khinchi hain taswiren

ze bas har shama yan aina-e-hairat parasti hai

kare hain ghuncha-e-minqar-e-tuti naqsh-e-gul giren

sapnad ahangi-e-hasti-o-sai-e-nala farsai

ghubar aluda hain jun dud-e-sham-e-kushta taqriren

hujum-e-sada lauhi pumba-e-gosh-e-harifan hai

wagarna khwab ki muzmar hain afsane mein taabiren

butan-e-shokh ki tamkin-e-baad az qatl ki hairat

bayaz-e-dida-e-nakhchir par khinche hai taswiren

asad tarz-e-uruj-e-iztirab-e-dil ko kya kahiye

samajhta hun tapish ko ulfat-e-qatil ki tasiren