خوابِ غفلت بہ کمیں گاہِ نظر پنہاں ہے

خوابِ غفلت بہ کمیں گاہِ نظر پنہاں ہے

شام سائے میں بہ تاراجِ سحر پنہاں ہے

دو جہاں گردشِ یک سبحۂ اسرارِ نیاز

نقدِ صد دل بہ گریبانِ سحر پنہاں ہے

خلوتِ دل میں نہ کر دخل بہ جز سجدۂ شوق

آستاں میں صفتِ آئینہ در پنہاں ہے

فکرِ پروازِ جنوں ہے سببِ ضبط نہ پوچھ

اشک جوں بیضہ مژہ سے تہِ پر پنہاں ہے

ہوش اے ہرزہ درا تہمتِ بے دردی چند

نالہ در گردِ تمنائے اثر پنہاں ہے

وہمِ غفلت مگر احرامِ فسردن باندھے

ورنہ ہر سنگ کے باطن میں شرر پنہاں ہے

وحشتِ دل ہے اسدؔ عالمِ نیرنگِ نشاط

خندۂ گل بہ لبِ زخمِ جگر پنہاں ہے

khwab-e-ghaflat ba kamin gah-e-nazar pinhan hai

sham sae mein ba taraj-e-sahar pinhan hai

do jahan gardish-e-yak subha-e-asrar-e-niyaz

naqd-e-sad dil ba gareban-e-sahar pinhan hai

khalwat-e-dil mein na kar dakhl ba juz sajda-e-shauq

astan mein sifat-e-aina dar pinhan hai

fikr-e-parwaz-e-junun hai sabab-e-zabt na puchh

ashk jun baiza mizha se tah-e-pur pinhan hai

hosh ai harza dara tohmat-e-be dardi chand

nala dar gard-e-tamanna-e-asar pinhan hai

wahm-e-ghaflat magar ehram-e-fasradan bandhe

warna har sang ke batin mein sharar pinhan hai

wahshat-e-dil hai asad alam-e-nairang-e-nishat

khanda-e-gul ba lab-e-zakhm-e-jigar pinhan hai