بس کہ سودائے خیالِ زلف وحشت ناک ہے

بس کہ سودائے خیالِ زلف وحشت ناک ہے

تا دلِ شب آبنوسی شانہ آسا چاک ہے

یاں فلاخن باز کس کا نالۂ بے باک ہے

جادہ تا کہسار موئے چینیٔ افلاک ہے

ہے دو عالم ناز یک صیدِ شہِ دُلدل سوار

یاں خطِ پرکارِ ہستی حلقۂ فتراک ہے

خلوتِ بال و پرِ قمری میں وا کر راہِ شوق

جادۂ گلشن بہ رنگِ ریشہ زیرِ خاک ہے

عیش گرمِ اضطراب و اہلِ غفلت سرد مہر

دورِ ساغر یک گلستاں برگ ریزِ تاک ہے

عرضِ وحشت پر ہے نازِ ناتوانی ہائے دل

شعلۂ بے پردہ چینِ دامنِ خاشاک ہے

ہے کمندِ موجِ گل فتراکِ بے تابی اسدؔ

رنگ یاں بُو سے سوارِ توسنِ چالاک ہے

bas ke sauda-e-khayal-e-zulf-e-wahshat nak hai

ta dil-e-shab abnusi shana asa chak hai

yan falakhan baz kis ka nala-e-be bak hai

jada ta kohsar mu-e-chini-e-aflak hai

hai do alam naz yak said-e-shah-e-daldal sawar

yan khat-e-parkar-e-hasti halqa-e-fitrak hai

khalwat-e-bal-o-par-e-qumri mein wa kar rah-e-shauq

jada-e-gulshan ba rang-e-resha zer-e-khak hai

aish garm-e-iztirab-o-ahl-e-ghaflat sard mehr

daur-e-saghar yak gulistan barg rez-e-tak hai

arz-e-wahshat par hai naz-e-natawani hae dil

shola-e-be parda chain-e-daman-e-khashak hai

hai kamand-e-mauj-e-gul fitrak-e-be tabi asad

rang yan bu se sawar-e-tosun-e-chalak hai