عذارِ یار نظر بندِ چشمِ گریاں ہے

عذارِ یار نظر بندِ چشمِ گریاں ہے

عجب کہ پرتوِ خور شمعِ شبنمستاں ہے

ہجومِ ضبطِ فغاں سے مری زبانِ خاموش

بہ رنگِ بستہ بہ زہراب دادہ پیکاں ہے

قبائے جلوہ فزا ہے لباسِ عریانی

بہ طرزِ گل رگِ جاں مجھ کو تارِ داماں ہے

لبِ گزیدۂ معشوق ہے دلِ افگار

کہ بخیہ جلوہ آثارِ زخمِ دنداں ہے

کشودِ غنچۂ خاطر عجب نہ رکھ غافل

صبا خرامیٔ خوباں بہار ساماں ہے

فغاں کہ بہرِ شفائے حصولِ ناشدنی

دماغ ناز کشِ منّتِ طبیباں ہے

طلسمِ منتِ یک خلق سے رہائی دی

جہاں جہاں مرے قاتل کا مجھ پہ احساں ہے

جنوں نے مجھ کو بنایا ہے مدعی میرا

ہمیشہ ہاتھ میں میرے مرا گریباں ہے

اسدؔ کو زیست تھی مشکل اگر نہ سن لیتا

کہ قتلِ عاشقِ دلدادہ تجھ کو آساں ہے

izar-e-yar nazar band-e-chashm-e-giryan hai

ajab ke partau-e-khur sham-e-shabnamsitan hai

hujum-e-zabt-e-fughan se miri zaban-e-khamosh

ba rang-e-basta ba zahrab dada paikan hai

qaba-e-jalwa faza hai libas-e-uryani

ba tarz-e-gul rag-e-jan mujh ko tar-e-daman hai

lab-e-gazida-e-maashuq hai dil-e-afgar

ke bakhiya jalwa asar-e-zakhm-e-dandan hai

kashud-e-ghuncha-e-khatir ajab na rakh ghafil

saba khirami-e-khuban bahar saman hai

fughan ke bahr-e-shifa-e-husul-e-nashudni

dimagh-e-naz kash-e-minnat-e-tabiban hai

tilism-e-minnat-e-yak khalq se rihai di

jahan jahan mire qatil ka mujh pe ehsan hai

junun ne mujh ko banaya hai muddai mera

hamesha hath mein mere mira gareban hai

asad ko zist thi mushkil agar na sun leta

ke qatl-e-ashiq-e-dildada tujh ko asan hai