آئے ہیں پارہ ہائے جگر درمیان اشک

آئے ہیں پارہ ہائے جگر درمیان اشک

لایا ہے لعل بیش بہا کاروان اشک

ظاہر کرے ہے جنبش مژگاں سے مدعا

طفلانہ ہاتھ کا ہے اشارہ زبانِ اشک

میں وادیٔ طلب میں ہوا جملہ تن غرق

از بس کہ قطرہ زنی تھا بسانِ اشک

رونے نے طاقت اتنی نہ چھوڑی کہ ایک بار

مژگاں کو دوں فشار پئے امتحانِ اشک

دل خستگاں کو ہے طربِ صد چمن بہار

باغِ بخون تپیدن و آبِ روانِ اشک

سیل بنائے ہستیٔ شبنم ہے آفتاب

چھوڑے نہ چشم میں تپشِ دل نشانِ اشک

ہنگامِ انتظارِ قدومِ بتاں اسدؔ

ہے بر سر مژہ نگراں دید بان اشک

ae hain para ha-e-jigar darmiyan ashk

laya hai laal besh baha karwan-e-ashk

zahir kare hai jumbish-e-mizhgan se muddaa

tiflana hath ka hai ishara zaban-e-ashk

main wadi-e-talab mein hua jumla tan-e-gharq

az bas ke qatra zani tha basan-e-ashk

rone ne taqat itni na chhori ke ek bar

mizhgan ko dun fishar piye imtihan-e-ashk

dil khissatgan ko hai tarab-e-sad chaman bahar

bagh-e-bakhon tapidan-o-ab-e-rawan-e-ashk

sail-e-banae hasti-e-shabnam hai aftab

chhore na chashm mein tapish-e-dil nishan-e-ashk

hangam-e-intizar-e-qudum-e-butan asad

hai bar sar mizha nigaran did ban ashk