نازِ لطفِ عشق با وصفِ توانائی عبث

نازِ لطفِ عشق با وصفِ توانائی عبث

رنگ ہے سنگِ محک دعوائے مینائی عبث

ناخنِ دخلِ عزیزاں یک قلم ہے نقب زن

پاسبانیٔ طلسمِ کنجِ تنہائی عبث

محملِ پیمانۂ فرصت ہے بر دوشِ حباب

دعویٔ دریا کشی و نشہ پیمائی عبث

جانِ عاشق حاملِ صد غلبۂ تاثیر ہے

دل کو اے بیداد خو تعلیمِ خارائی عبث

یک نگاہِ گرم ہے جوں شمع سر تا پا گداز

بہرِ از خود رفتگاں رنجِ خود آرائی عبث

قیس بھاگا شہر سے شرمندہ ہو کر سوئے دشت

بن گیا تقلید سے میری یہ سودائی عبث

اے اسدؔ بے جا ہے نازِ سجدہ عرض نیاز

عالمِ تسلیم میں یہ دعویٰ آرائی عبث

naz-e-lutf-e-ishq ba wasf-e-tawanai abas

rang hai sang-e-mahak daawae minai abas

nakhun-e-dakhl-e-azizan yak qalam hai naqb zan

pasbani-e-tilism-e-kunj-e-tanhai abas

mahmil-e-paimana-e-fursat hai bar dosh-e-habab

daawa-e-dariya kashi-o-nasha paimai abas

jan-e-ashiq hamil-e-sad ghalba-e-tasir hai

dil ko ai bedad khu taalim-e-kharai abas

yak nigah-e-garm hai jun sham-e-sar ta pa gudaz

bahr-e-az khud raftagan ranj-e-khud arai abas

qais bhaga shahr se sharminda ho kar su-e-dasht

ban gaya taqlid se meri ye saudai abas

ai asad be ja hai naz-e-sajda arz-e-niyaz

alam-e-taslim mein ye daawa arai abas