محوِ آرامیدگی سامانِ بے تابی کرے

محوِ آرامیدگی سامانِ بے تابی کرے

چشم میں توڑے نمک داں تا شکر خوابی کرے

آرزوئے خانہ آبادی نے ویراں تر کیا

کیا کروں گر سایۂ دیوار سیلابی کرے

نغمہ ہا وابستۂ یک عقدۂ تارِ نفس

ناخنِ تیغِ بتاں شاید کہ مضرابی کرے

صبح دم وہ جلوہ ریزِ بے نقابی ہو اگر

رنگِ رخسارِ گلِ خرشید مہتابی کرے

زخم ہائے کہنۂ دل رکھتے ہیں جوں مردگی

اے خوشا گر آبِ تیغِ ناز تیزابی کرے

بادشاہی کا جہاں یہ حال ہو غالبؔ تو پھر

کیوں نہ دلی میں ہر اک ناچیز نوابی کرے

mahw-e-aramaidagi saman-e-be tabi kare

chashm mein tore namak dan ta shakar khwabi kare

arzu-e-khana abadi ne wiran tar kiya

kya karun gar saya-e-diwar sailabi kare

naghma ha wabasta-e-yak uqda-e-tar-e-nafas

nakhun-e-tegh-e-butan shayad ke mizrabi kare

subh dam wo jalwa rez-e-be naqabi ho agar

rang-e-rukhsar-e-gul-e-khurshid mahtabi kare

zakhm ha-e-kohna-e-dil rakhte hain jun murdagi

ai khusha gar ab-e-tegh-e-naz tezabi kare

badshahi ka jahan ye hal ho ghalib to phir

kyun na dilli mein har ik nachiz nawwabi kare