دیکھتے تھے ہم بہ چشمِ خود وہ طوفانِ بلا

دیکھتے تھے ہم بہ چشمِ خود وہ طوفانِ بلا

آسمانِ سفلہ جس میں یک کفِ سیلاب تھا

موج سے پیدا ہوئے پیراہنِ دریا میں خار

گریہ وحشت بے قرارِ جلوۂ مہتاب تھا

جوشِ تکلیفِ تماشا محشرستانِ نگاہ

فتنۂ خوابیدہ کو آئینہ مشتِ آب تھا

بے خبر مت کہہ ہمیں بے درد خود بینی سے پوچھ

قلزمِ ذوقِ نظر میں آئینہ پایاب تھا

بے دلی ہائے اسدؔ افسردگی آہنگ تر

یادِ ایّامے کہ ذوقِ صحبتِ احباب تھا

dekhte the ham ba chashm-e-khud wo tufan-e-bala

asman-e-sifla jis mein yak kaf-e-sailab tha

mauj se paida hue pairahan-e-dariya mein khar

girya wahshat be qarar-e-jalwa-e-mahtab tha

josh-e-taklif-e-tamasha mahsharsitan-e-nigah

fitna-e-khwabida ko aina musht-e-ab tha

be khabar mat kah hamen be dard khud bini se puchh

qulzum-e-zauq-e-nazar mein aina payab tha

be dili hae asad afsurdagi ahang tar

yad-e-iumme ke zauq-e-sohbat-e-ahbab tha