تو پست فطرت اور خیالِ بسا بلند

تو پست فطرت اور خیالِ بسا بلند

اے طفلِ خود معاملہ قد سے عصا بلند

ویرانے سے جز آمد و رفتِ نفس نہیں

ہے کوچہ ہائے نَے میں غبار صدا بلند

رکھتا ہے انتظارِ تماشائے حسنِ دوست

مژگانِ باز ماندہ سے دستِ دعا بلند

موقوف کیجیے یہ تکلف نگاریاں

ہوتا ہے ورنہ شعلۂ رنگِ حنا بلند

قربانِ اوج ریزیٔ چشمِ حیا پرست

یک آسماں ہے مرتبۂ پشتِ پا بلند

ہے دلبری کمیں گر ایجادِ یک نگاہ

کارِ بہانہ جوئی چشمِ حیا بلند

بالیدگی نیازِ قدِ جاں فزا اسدؔ

در ہر نفس بہ قدرِ نفس ہے قبا بلند

tu past fitrat aur khayal-e-basa buland

ai tifl-e-khud muamla qad se asa buland

wirane se juz amad-o-raft-e-nafas nahin

hai kucha hae nai main ghubar-e-sada buland

rakhta hai intizar-e-tamasha-e-husn-e-dost

mizhgan-e-baz manda se dast-e-dua buland

mauquf kijiye ye takalluf nigariyan

hota hai warna shola-e-rang-e-hina buland

qurban-e-auj rezi-e-chashm-e-haya parast

yak asman hai martaba-e-pusht-e-pa buland

hai dilbari kamin gar-e-ijad-e-yak nigah

kar-e-bahana joi chashm-e-haya buland

balidagi niyaz-e-qad-e-jan faza asad

dar har nafas ba qadar-e-nafas hai qaba buland