بے گانۂ وفا ہے ہوائے چمن ہنوز

بے گانۂ وفا ہے ہوائے چمن ہنوز

وہ سبزہ سنگ پر نہ اُگا کوہ کُن ہنوز

فارغ مجھے نہ جان کہ مانندِ صبح و مہر

ہے داغِ عشق زینتِ جیبِ کفن ہنوز

ہے نازِ مفلساں زرِ از دست رفتہ پر

ہوں گل فروِشِ شوخیٔ داغِ کہن ہنوز

مے خانۂ جگر میں یہاں خاک بھی نہیں

خمیازہ کھینچے ہے بتِ بیدادِ فن ہنوز

یا رب یہ درد مند ہے کس کی نگاہ کا

ہے ربطِ مشک و داغِ سوادِ ختن ہنوز

جوں جادہ سر بہ کوئے تمنّائے بے دلی

زنجیرِ پا ہے رشتۂ حب الوطن ہنوز

میں دور گردِ قربِ بساطِ نگاہ تھا

بیرونِ دل نہ تھی تپشِ انجمن ہنوز

تھا مجھ کو خار خار جنونِ وفا اسدؔ

سوزن میں تھا نہفتہ گلِ پیرہن ہنوز

be gana-e-wafa hai hawa-e-chaman hanoz

wo sabza sang par na uga koh kun hanoz

farigh mujhe na jan ke manind-e-subh-o-mehr

hai dagh-e-ishq zinat-e-jeb-e-kafan hanoz

hai naz-e-muflisan zar-e-az dast-e-rafta par

hun gul farosh-e-shokhi-e-dagh-e-kuhan hanoz

mai khana-e-jigar mein yahan khak bhi nahin

khamyaza khinche hai but-e-bedad-e-fan hanoz

ya rab ye dard mand hai kis ki nigah ka

hai rabt-e-mushk-o-dagh-e-sawad-e-khutan hanoz

jun jada sar ba ku-e-tamannae be dili

zanjir-e-pa hai rishta-e-hub alwatan hanoz

main dur gard-e-qurb-e-bisat-e-nigah tha

beron-e-dil na thi tapish-e-anjuman hanoz

tha mujh ko khar khar junun-e-wafa asad

sozan mein tha nihufta gul-e-pairahan hanoz